АЛБАНЛАР (ўзларини шкиптар деб атайдилар) — Албания Республикасининг асосий халқи. Умумий сони 6,1 млн. (1992). Албанияда 3,250 млн. киши, Югославияда (1,985 млн. киши), Македонияда (500 минг киши), Италияда, Грецияда, РФ ва б. давлатларда яшайди. Тили ҳинд-европа тиллари оиласига киради. Албанлар кад. даврларда Болқон я. о. нинг ғарбий қисмида яшаган иллирий, қисман фракийлар авлодидир. «Албанлар» этноними дастлаб мил. 2-а. га оид манбаларда тилга олиниб, 11-а. дан ҳоз. Албаниянинг бутун аҳолисига нисбатан қўлланилган. Албанлар европеоид ирқига мансуб. Албанларнинг кўпчилик қисми ислом динини қабул қилган, бир қисми православ ва католик. Деҳқончилик, чорвачилик билан шуғулланадилар. Саноатда ҳам ишлайдилар.