АЛЕАТИКО, Алеатико перо, Ува лиатика — винобоп узум нави. 1830 й. да Италиядан Кримга, 19 — а. нинг 2-ярмида Ўзбекистонга келтирилган. Ўрта Осиёда кенг тарқалган. Тупи ўртача ўсади. Барги бир оз чўзиқ, арра тишли, туксиз. Гули икки жинсли. Узум боши конуссимон цилиндр шаклида, ўртача катталикда (бўйи 15—18 см, эни 10—13 см), огирлиги 140—150 г, шингиллари ўртача тиғиз. Ғужуми думалоқ, қизғиш-кўк. Эти мускат ҳидли, ширадор; Ҳосили фаол ҳарорат 2800°—3200° бўлганда 140—160 кунда пишиб етилади (сент. ўрталарида), таркибидаги қанд 25—26% га етади. Ҳосилдорлиги 90—100 ц/га. Токи сувсизликка чидамсиз. Алеатико ўтлоқи ва соз тупроқларда яхши ўсади. Рага билан зарарланади, кул касаллигига чидами ўртача.