АРЧМАН — Туркманистоннинг Копет-доғ этакларидаги шифобахш сувли курорт. Арчман т. й. станциясидан 9 км нарида жойлашган. Иқлими кескин континентал, ёзи жуда иссиқ (июлнинг ўртача т-раси 30°). Кам водород сульфидли минерал булоқ сувлари ваннага тушиш ва ичиш учун ишлатилади. Қон айланиш, овқат ҳазм қилиш, ҳаракат ва таянч органлари касалликларида, тери, гинекологик касалликларда тавсия этилади. Санаторий, ванна қабул қилиш биноси бор. Йил бўйи ишлайди.