АТИРГУЛ МОЙИ — эфир мойи; тиниқ мойсимон хушбўй сарғиш суюқлик. Зичлиги 950 — 990 кг/м3 (20° да). Атиргулнинг, асосан қозонлик (Болгариядаги шаҳар номидан) атиргулнинг гулбаргини сув буғи билан ҳайдаш ёки учувчан органик эритувчилар (петролей эфири, бензол, этил спирт ва б.) воситасида олинади. Сув буғи билан ҳайдаш усули кўпроқ қўлланилади. 1 кг мой 2 — 5 т гулбаргдан олинади. Атиргул мойи таркибига 200 дан ортиқ компонентлар (фенилэтил спирти, терпен спиртлари — цитронеллол, нерол, гераниол, линалоол ва уларнинг эфирлари, алифатик альдегидлар ва б.) киради. Атиргул мойининг спиртда эримайдиган қисми (тахм. 5%)ни стеароптенлар (парафин углеводородлари) ташкил қилади. Юқори сифатли атирлар тайёрлашда ишлатилади.