АВСТРАЛОРП ТОВУҚ ЗОТИ — гўшт ва тухум учун боқиладиган зот. Австралияда 20-а. нинг 20-й. ларида инглиз қора орпингтон товуқ зоти негизида олинган. Оёклари калта, пати товланувчан қора, танаси чўзиқ. Хўрозларининг тирик вазни 3,5—4 кг, товуғиники 2,5 — 2,7 кг. Бир йилда 180 ва ундан кўпроқ тухум қилади. Тухумлари оч жигарранг, вазни ўртача 55—60 г. Асосан Австралия ва Жан. Африкада боқилади. Ўзбекистонга 50-й. ларда келтирилган.