АВТОНОМОВ Анатолий Иванович

АВТОНОМОВ Анатолий Иванович (1898.24.2, Иваново-Вознесенск — 1968. 27.4, Тошкент) — селекциячи олим, Ўзбекистон ФА мухбир аъзоси (1952), проф. (1955), Ўзбекистода хизмат кўрсатган фан арбоби (1944). Иваново политехника ин-ти тугатган (1925). Туркистон селекция ст-яси филиали мудири (Байрамали ш., 1925 — 30). Бутуниттифоқ пахтачилик ин-тининг Марказий селекция ст-ясида сектор мудири (1930 — 55), Тошкент Қишлоқ хўжалиги ин-ти пахтачилик кафедраси мудири (1946 – 68). Автономов 35-1, 35-2 ингичка толали ғўза навлари, Си-Айленд типидаги навлар муаллифи, ёввойи перу ғўзасидан фойдаланиб, фузариоз вилтга чидамли, кўсаклари йирик ингичка толали ғўза навлари селекцияси усулиятини ишлаб чиққан ва шу асосда бир қанча ғўза навларини яратган.

Ас: Селекция тонковолокнистых сортов хлопчатника в Узбекистане, Т., 1973.