АВТОЮКЛАГИЧ — автомобиль ва вагонларга юк ортиш ва тушириш, омборларда юкни тахлаш, саноат корхоналарида бир цехдан иккинчи цехга юк ташиш учун ишлатиладиган машина. Юкни ташиш ва уни кўтариш учун Автоюклагич ларда очилиб-ёпилувчи қамрагич бўлади, Автоюклагичнинг қамрагичи хаскашга ўхшатиб ишланган, гидравлик ёки механик мослама ёрдамида кўтариб-туширилади. Сочилувчан ёки бўлак-бўлак юкларни ташиш учун универсал Автоюклагич ларнинг камрагичи стрела ва ковш (чўмич) билан алмаштирилади. Автоюклагич ёрдамида 3 — 5 т юкни ортиш, тушириш ёки тахлаш мумкин.