АЗИМОВ Шариф Турсунович (1954.14.5, Самарқанд ш.) — кулол, Ўзбекистон БА ҳақиқий аъзоси (1997). Бобоси кулол Умарқул Жўрақуловдан ҳунар ўрганган. Ўзбекистон Рассомлари уюшмаси Бадиий жамғармасининг и. ч. устахонасида кулол (1975-78); 1978 й. дан Ўзбекистон Рассомлар уюшмаси Бадиий жамғармаси қошидаги «Уста» бирлашмаси Самарқанд бўлимида кулол-рассом. Азимов кулоллик санъати сирларини урганиҳда изланиб, бу соҳада ўзига хос ижодий йўналиш яратди. У яратган «Аждаҳо» (сопол, 1978), «Тимсоҳ» (сопол) каби ўзига хос жозибали кўза, хум ва б. идишлар музейларда сақланади.