БЕРТЛО

БЕРТЛО, Вертело (Berthelot) Пьер Эжен Марселен (1827.25.10—Париж 1907.18.3)—француз кимёгари ва жамоат арбоби. Термокимё асосчиларидан бири. Глицерин билан ёғ кислоталаридан табиий ёғларга яқин бирикмаларни синтез қилган. Глицериннинг уч атомли спирт эканлигини, этилендан сульфат кислота иштирокида этил спирт олиш мумкинлигини исботлаган (1854), Б. оддий углеводородлардан метан, этилен, ацетилен, бензол ва б. ни синтез қилган. 1867 й. да водород йодид билан органик моддаларни кайтаришнинг умумий усулини ишлаб чиққан. Бертло ёқилғиларнинг иссиқлик бериш қобилиятини ўлчаш учун калориметрик бомбани ихтиро қилган. Бертло 1861—63 й. ларда француз кимёгари Л. Пеан де СенЖиль билан ҳамкорликда спирт ва кислоталардан мураккаб эфир ҳосил бўлиш тезлиги устида ишлар олиб бориб, кимёвий кинетиката муҳим ҳисса қўшган.