БИЯ, байтал — вояга етган урғочи от. Айғирдан алоҳида сақланади. Бия 3 ёшидан (ғунанлик давридан) то 20— 25, баъзан ундан ҳам катта ёшгача қочирилади. Бўғозлик даври ўртача 11 ой. Биядан соғлом қулун олиш учун бутун бўғозлик даврида қалтис ҳаракатлардан, шамоллашдан эҳтиёт қилинади, оғир юк ташишда ишлатилмайди, толиқишига йўл қўйилмайди. Қулунини 6 — 9 ой эмизади. Бир суткада 15 л гача (айрим серсут зотлари 25 л гача) сут беради (қ. Бия сути).