БОШТУЗИ — бошга тақиладиган зийнат буюми, Хоразмдагина сақланиб қолган тақинчоқ. Келинлар якка ҳолда пешонага ва жуфт ҳолда чаккаларига таққан. Боштузи шакли асосига учбурчак жойлашган ва унинг асосидан юқорига томон учи думалоқ шаклда якунланувчи ўқустун чиқарилган, учбурчак бурчакларидан бўртма, ўқустундан ён томонларига 3 жуфт шохчалар чиқарилган, ҳар бир бўртма ва шохчаларга, шунингдек учбурчак асосига баргакли шокилалар осилган. Учбурчак марказига йирик ва бўртмаларга кичик ҳажмли, атрофи феруза кўзлар ҳалқаси б-н ўралган текис доирага эса рангли шиша кўзлар ўрнатилган. Тадрижий ривожланишида зардуштийлик маъбудаси Анахита образи билан рамзий маънога эга бўлган «ҳаёт дарахти» мавзулари уйғунлашиб кетган ягона анъанавий шаклдаги тақинчоқ.