БРАТИСЛАВА — Словакия Республикасининг пойтахти, Австрия ва Венгрия чегарасига яқин жойда. Мамлакатнинг йирик иқтисодий ва маданий маркази. Аҳолиси 452 минг киши (1997). Братислава 10-а. бошларида Буюк Моравия князлигидаги қалъа сифатида тилга олинади. Бу князликни венгерлар тормор этгач (907), Б. Пожонь номи билан Венгрияга қўшилди. Ўрта асрларда эса немислар қўлига ўтиб, Пресбург деб номланган. 1536 й. да габсбургларнинг Венгриядаги марказига айланди. 1541— 1784 й. ларда Б. Венгрия қироллиги пойтахти, 18-а. охиридан Словакия миллий озодлик ҳаракатлари маркази бўлган. 1918 й. да Чехословакия ташкил топгандан сўнг, Словакия Республикасининг, 1992 й. дан мустақил Словакия Республикаси пойтахти.
Братислава транспорт йўллари тугуни. Дунай бўйидаги йирик портлардан. Аниқ машинасозлик ва станоксозлик, электротехника, ёғочсозлик, тўқимачилик, озиқ-овқат, полиграфия, қурилиш материаллари и. ч. саноати ривожланган. Кимё ва нефть кимёси саноати маркази. Словакия ФА (1953), Словакия музейи, унт, политехника инти, иктисод, бадиий ва театр интлари бор. Меъморий ёдгорликлардан готика услубидаги собор (1221), Михайлов дарвозаси (14—18-а. лар) ва б. сақланган.