БРЕКЧИЯ (итал. breccia — парча, бўлак) — қиррали бўлаклардан иборат цементлашган тоғ жинси. Бўлаклари бир см дан катта. Келиб чиқишига кўра, вулканоген, чўкинди ва тектоник Брекчиялар бўлади. Таркибига кўра, бир хил тоғ жинслари бўлакларидан (мономикт) ва турли тоғ жинси бўлакларидан ( полимикт) ташкил топган турлари мавжуд. Вулканоген Брекчия ёпишқоқ лава бўлакларини суюқ лава билан цементланишидан (лава Брекчияси), вулкан туфлари ва б. вулканоген жинс бўлакларидан (туф брекчияси), вулкан вилоятларидаги лой окимини диагенезга учрашидан (лахарлар) ҳосил бўлади. Чўкинди Брекчия континентал шароитларда ён бағир делювийлари, сел оқими ётқизиқлари ёки карстлар шипининг қулаб тушишидан ҳосил бўлган маҳсулотларни цементланишидан таркиб топали. Суякли Брекчия ҳам учрайди. Улар умуртқали ҳайвонларнинг кўплаб қирилиши ва кўмилиб кетишидан пайдо бўлади. Денгиз шароитида Брекчия қирғоқларнинг ўпирилишидан ёки рифларнинг емирилишидан вужудга келади. Тектоник Брекчия (ишқаланиш Б.) тектоник ҳаракатлардан ер ёриклари бўйлаб тоғ жинсларининг майдаланиб цементланишидан ҳосил бўлади.