БУҒДОЙ НЕМАТОДАСИ (Anguina tritici) — буғдой, жавдар, арпа, сули ва б. бошокли экинлар бошоғида ғудда (галла)лар пайдо қиладиган зараркунанда тўгарак чувалчанг. Ўсимлик Буғдой нематодаси билан қаттиқ зарарланганда бошоғи майдалашиб ўсмай қолади, дони ўрнида ғудда (галла)лар пайдо бўлади. Ғуддалар дондан кичикроқ, жуда пишиқ, жигарранг пуст билан қопланган бўлиб, ҳар бир ғудда ичида 5—15 мингтагача личинка бўлади. Ерга тўкилган ғуддалар ивиб ёрилади. Ундан чиққан личинкалар маиса танасини тешиб кириб, барг қўлтиқларига кўтарилади, гул муртагига жойлашиб, ўсимликни касаллантиради. Буғдой нематодаси дон, похол ҳамда қ. х. асбобускуналари воситаси билан тарқалади. Буғдой нематодаси 20-а. нинг ўрталаригача — 1937 й. да ғуддалар аралашган уруғликни экиш ман қилинишига қадар кўп тарқалган эди. Ҳозир Буғдой нематодаси МДҲ ҳудудида деярли тугатилган. Кураш чоралари: зарарланмаган соғлом уруғлик экиш, Буғдой нематодаси пайдо бўлган минтақалардан дон олиб чиқишни тақиқлаш, зарарланган донларни алоҳида хирмонларда янчиш ва тозалаш.