БУРУНДУҚЛАР

БУРУНДУҚЛАР, оласичқонлар (Tamias) — кемирувчилар туркумининг татинсимонлар оиласи уруғи. Шим. ярим шардаги ўрмонларда тарқалган. Бир неча тури маълум. Россиянинг шарқий қисмидаги ўрмонларда Осиё Б. и (Т. sibiricus) учрайди. Танасининг уз. 14 см, думи 9 см га яқин, орқа қисмида бешта қора йўли бўлади. Қишда уйқуга кетади, ҳар йили бир марта (баъзаи 2 марта) 4—10 та бола туғади. Нина барглилар уруғи, кенгбаргли дарахтлар барги, куртаги ва меваси билан озиқланади, қишга 4 кг гача озиқ (асосан кедр ёнғоғи) тўплайди. Бурундуқлар лунжида озиқ олиб юрадиган халтаси бўлади. Ўрмончилик ва қ. х. га қисман зиён келтиради. Осиё Бурундуқлари кана энцефалитининг иккинчи даражали тарқатувчисидир.