ЧУЛИМЛАР, чулим татарлари — Чулим дарёси (Обь дарёси ирмоғи)нинг ўрта ва қуйи оқими бўйларида яшовчи туркий гуруҳ. Чулимлар Сибирь хонлиги қулагач, Шарққа томон силжиган айрим туркий қавмлар, қисман телеутлар ва Енисей қирғизларининг селькуплар ва кетларнинг майда гуруҳлари билан аралашуви натижасида 17 — 18-а. ларда шаклланган. Чулимлар ўтроқ ҳаёт тарзи кечириб, деҳқончилик ва чорвачилик билан машғул бўлишган. Чулимлар аждодлари хакаслар ва руслар билан аралашиб кетган.