ЭЛЬБРУС (кабардинча — Ошхомахо, болқорча — Мингитов) — Катта Кавказнинг Ён тизма системасидаги энг баланд тоғ массиви. Гранит ва кристалли сланецлардан тузилган баланд цокольда жойлашган ва, асосан, андезитдан ташкил топган сўнган вулканнинг қўш чўққили конуси. Ғарбий чўққининг бал. — 5642 м, шарқийси — 5621 м. Улар бал. 5325 м бўлган тоғ бели билан ажралган. Эльбруснинг устки қисми фирн ва музликлар билан қопланган. Ундан ҳамма томонга муз парраклари радиал йўналишда тарқалган. Музликларнинг (умумий сони 50 дан зиёд) майд. 134,5 км2. Улардан энг йириклари Катта Азав, Ирик, Терскўл. Эльбрус ёнида, Баксан дарёсининг юқори оқимида кўчки ва селлар лаб. и жойлашган. Эльбруснинг шарқий чўққиси илк бор (1829 йилда) рус экспедициясининг йўл бошловчиси К. Хаширов (кабардин) томонидан забт этилган, ғарбий чўққисига эса Ф. Грове бошчилигидаги инглиз альпинистлари (йўл бошловчиси болқор А. Соттаев) чиқишган (1874 йилда). Тоғ массиви ён бағриларидан Шим. Кавказнинг йирик дарёлари (Кубань ва Терек) бошланади. Эльбрусга ёндашган ҳудуд альпинизм ва тоғ чанғи спорти, туризм марказларидан бири.