ЭРАТОСФЕН (мил. ав. тахм. 276, Кирена, ҳоз. Ливия — 194, Александрия, Миср) — қадимий юнон олими. Александрия (Искандария) ва Афина шаҳриларида таҳсил кўрган. Искандария кутубхонасининг бошлиғи бўлган. Мат. фанида туб сонларни топиш усулини таклиф этган. Математик географияга асос солган, жумладан, ер юзининг обод қисми (эйкумена) нинг харитасини тузган. Биринчи бўлиб ер меридиани ёйи узунлигини ҳисоблаган. Фанга «география», «кенглик», «узунлик» тушунчаларини киритган. Эратосфен хронология, астрономия, тилшунослик, фалсафа ва мусиқа билан ҳам шуғулланган. Эратосфен асарларининг айрим қисмларигина бизгача етиб келган.