ФАРНАК II (? — мил. ав. 47) — Боспор подшоси (мил. ав. 63 й. дан). Шоҳ Митридат VI Евпаторнинг ўғли. Рим билан уруш чоғида Фарнак II . отасига хиёнат қилиб, Рим саркардаси Помпеи билан иттифоқ тузган ва Боспор давлатининг катта қисмида (Фанагориядан ташқари) ўз ҳокимиятини ўрнатган. 49—48 й. ларда Помпеи билан Юлий Цезарь (Мисрда эди) ўртасидаги низодан фойдаланиб Фанагорияни босиб олган ва Кичик Осиёни эгаллаш мақсадида юриш қилган. У Вифиния ва Амисосни эгаллаган, лекин 47 й. 2 авг. да Кичик Осиёнинг Зела ш. яқинидаги жангда Цезарь томонидан тормор келтирилган. Цезарь Сенатга «Vene, vidi, vici» («келдим, кўрдим, ғалаба қозондим») деб нома жўнатган. Римликлар Фарнак IIни озод қилиб кичик отряд билан Боспорга жўнатганлар, бу ерда ҳокимиятни Фарнак IIнинг ноиби Асандр эгаллаб олган эди. Ф. II Асандр билан бўлган жангда ҳалок бўлган.