ГАЙКА — 1) машина ва механизмларнинг қисмларини бир-бирига маҳкамлашда ишлатиладиган деталь; винт ёки болтга бураб киритилади. Гайка ичи резьбали, сирти олти ёки тўрт қиррали ва думалоқ бўлади. Тожсимон ва қулоқли Гайкалар ҳам бор. Г. нинг ўлчамлари, одатда, стандартлардан олинади, лекин баландлиги 0,8 d дан кичик бўлмаслиги керак (d — болт ёки винтдаги резьбали қисмнинг ташқи диаметри). Гайка пўлат, рангли металл ва полимерлардан тайёрланади. Аввал токарлик станокларида думалоқ ёки қиррали материал қирқиб олинади, сўнгра тегишли станокларда унга резьба очилади;
2) винтли механизмларда винтнинг айланма ҳаракатини бошқа деталь ва узелларнинг илгарилама ҳаракатига айлантириб берадиган деталь. Мас, домкратда шундай Гайка бор.