ГАЙМОР БЎШЛИҒИ — буруннинг қўшимча бўшлиғи; юқори жағ суягининг танасида жойлашган. Инглиз анатоми Н. Гаймор аниқлаган (1651). Ҳозир бу бўшлиқ тепа жағ коваги номи билан аталади. Гаймор бўшлиғи турли шакл ва ҳажмда бўлиб, тепадан ёноқ суяги, ташқаридан тепа жағ суяк танасининг юз пластинкаси, пастдан қаттиқ (суяк) танглай билан чегараланган. Ички қисмида жойлашган турли шаклдаги тешик бурун бўшлиғига очилади. Гаймор бўшлиғининг деворлари қон томирларга бой шиллиқ қават билан қопланган бўлиб, бурун бўшлиғига кирган ҳавони илитиб, намлаб, чанг тозалашда қатнашади. Чақалоқ ва ёш болаларда Гаймор бўшлиғи ва унинг шиллиқ қавати унчалик ривожланмаган, ҳажми кичик бўлгани учун совуқ ҳавода тез шамоллаб, яллиғланиши мумкин (қ. Гайморит).