ГЕОЛОГИК КЕСИМ, геологик профиль — жойнинг геологик тузилишининг вертикал текисликдаги график тасвирй. Бундай кесим тоғ жинсларининг йўналишига кўндаланг қилиб, айрим ҳолларда эса бирор бурчак остида тузилади. Геологик кесим геологик хариталарни тўлдиради ва уни аниқлаштиради. Ер юзасида олиб борилган геологик кузатишлар, бурғилашдан олинган маълумотлар ва турли геофизик усулларнинг натижаларидан Геологик кесим тузишда фойдаланилади. Геологик кесимда тоғ жинсларининг ўзаро муносабати, ёши, қатламларнинг қалинлиги, фацияларнинг бир-бирига ўтиши тасвирланади. Геологик кесимга жойнинг рельефи ва геологик тузилишини кўрсатувчи геологик харита, топографик профиль ва маркшейдерлик планлари асос қилиб олинади. Мухандислик Геологик кесим антропоген жинсларнинг қалин ғилофи билан қопланган р-нлар учун жуда муҳим. Геологик кесим турли масштабда: 1:1000000 (регионал кесим)дан 1:1000 — 1:50 (муфассал кесим)гача бўлади. Геологик кесимнинг вертикал ва горизонтал масштаби бир хил бўлади. Муҳандислик геол. сила, т. й. ва сув омборлари куришда ишлатиладиган Геологик кесимнинг вертикал масштаби горизонтал масштабга нисбатан 10 ва ҳатто 100 баравар катта бўлиши мумкин.