ГЕОТЕРМИК ЎЛЧАШЛАР — пармаланган қудуқларда геотермик градиентни аниқлашда ҳамда қатор разведкақидириш ва техник масалаларни ечишда қўлланиладиган усуллар. Геотермик ўлчашларда асосан қудуққа тушириладиган қаршиликли электр термометр ишлатилади. Бу асбобнинг ишига мис электр қаршилигининг т-рага нисбатан мутаносиб Ўзгариши асос қилиб олинган. Бурғилаш суюқлиги ва тоғ жинсларининг ҳар хил т-рага эга бўлганлиги учун иссиқлик ҳолати мувозанатга келгандан сўнг, яъни бурғилаш тамом бўлгандан бир неча кун ўтгандан сўнг геотермик градиент ўлчанади. Иссиқлик диаграммаларида чуқурлик ошиши билан т-ранинг умумий ўсиши ва газ, нефть, кумир, сульфид маъданлари билан боғлиқ айрим аномалиялар намоён бўлади. Олинган маълумотлар каротаж натижаларини таҳдил қилишда қўлланилади.