ГИЖЖАГА ҚАРШИ ДОРИЛАР — гелъминтозларнинг организмдаги гижжаларни йўқотиш мақсадида ишлатиладиган дорилар. Улар кўпинча гижжанинг турига қараб буюрилади, мас, энтеробиоз ва аскаридозни даволаш учун пирантел (комбантрин, гельминтокс), вермокс, ситракс, декарис (левамизол)дан фойдаланилади. 200—300 г қовоқ уруги ҳам яхши наф беради. Гименолепидоз ва б. тасмасимон гижжаларга қарши фенасал препарати ичилади; кейин тозаловчи ҳуқна қилинади. Юқоридаги дориларни ичиш тартиби (наҳорда, кечқурун ётиш олдидан, овкатдан олдин ёки кейин) ва миқдорини врач белгилайди; булар кўпинча препаратнинг ёрлиғида ҳам кўрсатилади.