ГИПЕРГЕН КОНЛАР, седиментоген конлар, экзоген конлар — Ер юзасида қад. ва ҳоз. геокимёвий жараёнлар б-н боғлиқ ҳолда ҳосил бўлган фойдали қазилма уюмлари. Гиперген конлар эндоген шароитида ҳосил бўлган минерал хом ашёларнинг механик ва биокимёвий қайта ўзгариши ва дифференциациясидан таркиб топади. Гиперген конлар нураш, сочма ва чўкинди конларга бўлинади. Океан ва денгиз туби ётқизиқларида чўкинди (кўмир, ёнувчи сланецлар, нефть, ёнувчи газ ва б.), ён бағирлар, дарё ва денгиз соҳилларининг бўш ётқизиқларида сочма (олтин, платина, титан, вольфрам ва б.), материк юзасида нураш (никель, темир ва б.) конлари ҳосил бўлади. Гиперген конларга нефть ва газ, кумир, кўпчилик рудали ва норуда конлари киради. Гиперген конларнинг саноат аҳамияти катта.