ГИПЕРГЛИКЕМИЯ (гипер… ва юн. glykys — ширин, haima — қон) — қонда қанднинг нормадан кўп бўлиши, яъни 120 мг % ёки 6 ммоль/л дан (Si системаси бўйича) ошиб кетиши. Вақтинчалик Гипергликемия соғлом кишиларда кўп ширинлик ёки углеводга бой овқатлар истеъмол қилинганда, зўр бериб жисмоний иш қилганда, қаттиқ оғриқ тутганда, руҳий кечинмаларда кузатилади. Гипергликемия қандли диабет касаллигининг асосий белгиси бўлиб, эндокрин безлар, хусусан меъда ости бези фаолиятининг бузилиши оқибатида келиб чиққан касалликларда, шунингдек, баъзи жигар касалликлари (вирусли гепатит, цирроз) ҳам рўй бериши мумкин.