ГОЛИЦИН ҚАТЛАМИ — Ер мантияси юқори қисмининг қуйи қатлами. Тахм. 400—900 км чуқурликда жойлашади. 1916 й. да рус олими Б. Б. Голицин аниқлаган. Чет эл адабиётларида «20° чегара ажратувчи» номи қабул қилинган. Сейсмик тўлқинларнинг ўтиш тезлиги Голицин қатламида тез ортиб боради. Голицин қатламида чуқурликка томон жинслар зичлигининг тез ошиб бориши ҳам тахмин қилинади. Бу жинсларнинг қайишқоқ сиқилиши, минераллар кристалл панжараларнинг қайта тузилишлари, молекулаларда атомларнинг қайта тақсимланиши ва эҳтимол чуқурликка томон тоғ жинсларининг кимёвий таркиби ўзгариб боришига қараб изоҳланади. Голицин қатлами атомлари ниҳоятда зич жойлашган янги минераллар (мас, стишовит — зичлиги 4,35 г/см3) пайдо бўлади.