ГУЮКХОН (1205-48) – мўғуллар империясининг улуғ қони (1246—48). Ўқтойхон (Угедай) (1186 — 1241)нинг тўнғич ўғли. Чингизхоннинг набираси. 1236—41 й. мўғул шаҳзодаларининг Ботухон бошчилигида Россия ва Шарқий Европага қилган босқинчилик юришларида қатнашган. Лекин отасининг вафотини (1241 й. март) эшитиб, шошилинч равишда ўз юртига қайтиб келган. 1246 й. сент. да Қорақурумда бўлиб ўтган Чингизхон авлодлари қурултойида Гуюкхон қонлик тахтига ўтқазилган. Отаси вафотидан кейин ўтган 5 йил мобайнида давлатни онаси Туракина хотун бошқариб турган. Гуюкхон ҳукмронлик даврида Кавказнинг жан. шарқий қисми, Кореянинг бир қисми босиб олинган. Хитой ва Эронни босиб олиш учун кураш давом эттирилган. Чиғатой улусинаиг ички ишларига аралашган. Гуюкхон Олтин Ўрда ҳукмдори Ботухонга қарши урушга отланиб йўлга чиққанда тўсатдан вафот этган.