ҲАСАНОВ Набижон Азимович

ҲАСАНОВ Набижон Азимович (1913, Самарқанд — 1972.28.8, Тошкент) — бастакор, созанда (ғижжак), Ўзбекистон халқ артисти (1967). Дастлаб, Т. Содиқовдан най ва ғижжак чалишни, ўрганган. Андижон театрида созанда (1927—29), Самарқанд театрида созанда (1930—32), мусиқа раҳбари (1932-35, 1938—39) ва бош дирижёр (1945—47), Ўзбек давлат мусиқали театри (1936— 37), Навоий театри халқ чолғу асбоблари ансамбли (1939—44)да мусиқа раҳбари, Ўзбекистон радиоқўмитаси халқ чолғу асбоблари оркес-трида концертмейстер (1947—52, 1957—72), Ўзбекистон давлат эстра-даси ашула ва рақс ансамблида созанда ва бадиий раҳбар (1952—55). Ҳасанов «Ғунчалар» (Т. Содиқов б-н), «Ўзбекистон қиличи» (М. Бурҳонов, Т. Жалилов ва б. б-н) каби асарларнинг муаллифларидан. Бастакорнинг истеъдоди кўпроқ ашула ва қўшиқларда намоён бўлди. Айниқса унинг «Салламно», «Кўрдим», «Айланай», «Жафо қилма» ашулалари, «Жона-жон ўлкам», «Она Самарқанд», «Ги-лос» каби оммавий ва «Интизор», «Гулчеҳралар», «Чарос» каби лирик қўшиқлари, ялла намуналари («Бахт ялласи», «Яйра, гўзал» ва ҳ. к.) машҳур. Айрим («Салламно» ва б.) асарлари «Нола» каби эстрада гуруҳлари томонидан янгича талқин топган.