ЖАННАТҚУШЛАР

ЖАННАТҚУШЛАР (Paradiseidae) – чумчуқсимонлар туркумининг оиласи. Пати жуда чиройли, ялтироқ. Нариларининг «безатувчи» пати узун бўлади. 43 тури маълум. Молукка я. о. дан то Луизиада архипелагигача бўлган жойларда ва Шарқий Австралияда яшайди. Жаннатқушлар қораялоқцан қузғунгача катталикда бўлади. Баъзиларининг думи жуда узун. Тропик ўрмонларда, бутазорларда, айрим турлари тоғларда яшайди. Косасимон уя қуриб, 1—2 та тухум босади. Ўсимлик уруғлари, мевалари, ҳашаротлар ва уларнинг личинкалари, ўргимчаклар, моллюскалар, калтакесаклар, қурбақалар, баъзилари нектар билан озиқланади. Пати бош кийим ва кийим-кечакларни безашда ишлатилади. Табиатни муҳофаза қилиш халқаро иттифоқи Қизил китобига 9 тури киритилган.

Жаннатқушлар: 1 — катта жаннатқуш; 2 — пашшатутар жаннатқуш; 3 — бокира жаннатқуш.