КАНТО ЗИЛЗИЛАСИ, Токио зилзил ас и — Япониянинг Токио ва Йокохама ш. лари жойлашган Канто р-нининг жан. қисмида 1923 й. 1 сент. да содир бўлган талафотли зилзила. Зилзила кучи, 12 балли шкала бўйича 10 — 11 балл, магнитудаси 7,9 бўлган. Зилзила эпицентри Йокохамадан 60 км, Токиодан 104 км узоқликда, Сагами қўлтиғида жойлашган. Кейинги маълумотлар бўйича у ерда 1649, 1703, 1855, 1891 й. ларда ҳам талафотли зилзилалар рўй берган. Лекин, 1923 й. даги Канто зилзиласи Япония тарихида энг кўп қурбонлар ва талафотлар келтирган зилзила ҳисобланади. Ушбу зилзила оқибатида 142807 киши ҳалок бўлган, 128266 уй батамом қулаган, 126233 уйга зарар етган ва 447218 уй ёниб кетган. Зилзиладан кейин бир неча дақиқа ўтгач, бир вақтнинг ичида кўп жойлардан ёнғин чиқиб, Токио ш. олов ҳалқаси ичида крлган ва ёнғин кўплаб одамлар ўлимига сабаб бўлган. Ундан ташқари,Сагама қўлтиғи, Идзу, Миура, Басо я. о. лари, зилзила таъсирида вужудга келган ва тўлқин баландлиги (амплитудаси) 10 м дан ортиқ бўлган цунамидан ҳам катта талафот кўрган. Бу зилзиладан кейин Токио ун-тида ва Япониянинг бир қанча шаҳарлари (Киото, Сендай ва б.)даги ун-тлар қошида сейсмология ин-тлари ташкил этилди, сейсмик ст-ялар тармоғи кенгайтирилди.