КАРАДРИНА

КАРАДРИНА, кичик қуруқлик тунлам и (Spodoptera exigua Hb.) — тунламлар оиласига мансуб капалак. Танасининг уз. 11 — 13 мм, қанотлари ёйилганда 23—34 мм. Тухумини (16—150 та) тўптўп қилиб ўсимликка (устини қорнидан тўкилган тукчалар билан ёпади), кузда эса тупроққа қўяди. Яшил ёки қўнғир кулранг тусдаги қуртининг уз. 2,5—3,0 см, 16 та оёғи бор. Ҳаво ҳароратига қараб йилда 2—8 авлод беради. Ривожланиш даври учун самарали ҳарорат йиғиндиси 350° бўлиши шарт. Ривожланиш цикли Ўрта Осиёда иссиқ ойларда 19—20, кеч кузда эса 60 ва ундан кўпроқ кунда тугайди. Карадринанинг яшаш ареали жуда кенг. Ҳар хил иқлим минтақаларида ва йил фаслига қараб капалаги маълум озуқа ўсимлигини танлайди. Дуккакдошлар, галладошлар, шўрадошлар, пиёзгулдошлар ва б. оилага мансуб ўсимликлар билан озиқланади. Ғўза ва б. ўсимликларнинг хавфли зараркунандаси. Бегона ўтлардан шўра, печак ва янтоқни ёқтиради. Экинларга, айниқса, майсалик ва ғунчалаш даврида катта зарар келтириб, уларни баъзан бутунлай қуритиб қўяди.

Кураш чоралари: кузда агротехник чоралар (кузги ҳайдаш, қишки суғориш ва б.)ни ўз вақтида ўтказиш. Баҳор ва ёзда Карадрина борлиги аниқланганда инсектицидлар (2—2,5 кг/га) билан кимёвий ишлов бериш; биологик воситалардан дендробациллин (4—6 кг/га), шунингдек, трихограммадан фойдаланиш мумкин.

/ld.-Ларченко Карадрина, Бе лончук С. Д., Карадринанинг кўпайиши ва унга қарши кураш тадбирлари, Т., 1966.