КЕНГ ҲАЖМЛИ КИНО — кенг ҳажмли (50—70 мм) киноплёнкадан фойдаланишга асосланган кинематография тури. 1955 й. да яратилган. Фильм махсус аппаратда суратга олинади ва намойиш қилинади. Одатда, асосан 70 мм ли плёнка ишлатилади. Оддий ва кенг экранли киноларда ишлатиладиган 35 мм ли плёнкага нисбатан бундай плёнкага анча кўп ахборотни сиғдириш ва катта (мас, 19,5×7 м) экранга тасвирни сифатли тушириш мумкин. Кенг ҳажмли кино тизимида 6 каналли магнит фонограмма қўлланилади: 5 таси овозни экран орқасига ўрнатилган карнайлар орқали стереофоник эшиттириш учун, олтинчиси кинотеатр залида овоз эффекти ҳосил қилиш учун мўлжалланади. Кенг ҳажмли кинонинг тасвирлаш сифати юксак.