КООРДИНАТАЛАР (лот. со – биргаликда, ordinatus — тартибланган, аниқланган) — нуқтанинг тўғри чизиқ, текислик, фазо ва турли юзалардаги ҳолатини аниқловчи сонлар. Мас, географияда маълум нуқта жойлашган кенглик ва узунликни кўрсатувчи сонлар (қ. Географик координаталар); астрономияда ёритқичнинг осмон сферасидаги ҳолатини белгиловчи сонлар. Нуқтанинг координаталари бирор координата системасида аниқланади. Мас, бир нуқтадан ўтувчи ўзаро тик уч тўғри чизиқ фазода Координаталар системасини ташқил қилади. Бунда М нуқтанинг координаталари х= ОА, у = OB, z= ОС бўлади (қ. Декарт координаталар тизими, Осмон координаталари, Параллактик учбурчак, Сферик координаталар, Топоцентрик координаталар, Тўғри бурчақли координаталар).