КОЗЛОВСКИЙ Алексей Фёдорович

КОЗЛОВСКИЙ Алексей Фёдорович (1905.15.10, Киев – 1977.3.1, Тошкент) — композитор, дирижёр, педагог. Ўзбекистонда хизмат кўрсатган санъат арбоби (1944), Ўзбекистон халқ артисти (1955), проф. (1958). Москва консерваториясини тугатган (1931). 1936 й. дан Тошкентда яшаган. Ўзбек давлат мусиқали (кейинчалик Ўзбек опера ва балет) театри дирижёри (1938-41), Ўзбек давлат филармонияси симфоник оркестрининг бадиий раҳбари ва бош дирижёри (1949—I 63). 1944 й. дан Тошкент консерваториясида ўқитувчи, кафедра мудири (1949—54 ва 1962—77). Ҳ. Носирова ижросида халқ, ашулаларидан «Фиғон», «Гул юз ўзра», «Ўзганча» ва «Танавор»ни ёзиб олиб, уларни айни шу хонанда овози ва симфоник оркестр учун ниҳоятда юқори бадиий савияда қайта ишлаган (1937). «Улуғбек» операси (1942, янги таҳрири — 1958), «Танавор» балети (1971), «Даврон ота» (Т. Содиқов б-н, 1941), «Шерали» (С. Василенко, М. Ашрафий б-н, 1942) мусиқали драмалари, «Лола» симфоник сюитаси (1937), вокал-симфоник, камерчолғу асарлар, ўзбек халқ чолғулари учун асарлар, қатор спектаклларга, «Тоҳир ва Зуҳра» (1945), «Насриддиннинг саргузаштлари» (1946) бадиий фильмларига мусиқалар ёзган. Композиторлик маҳорати ўзбек куйларини теран бадиий ифода воситалари билан уйғунлаштиришда, етук опера, балет, симфоник асарларида Европа ва Шарқ мусиқа хусусиятларини узвий боғлашида намоён бўлган. Ҳамза номидаги Ўзбекистон Давлат мукофоти лауреати (1973).

Ад.: В ы з го Т., Алексей Козловский, М., 1966.

Loading...