КВИНСЛЕНД — Австралия Иттифоқидаги штат. Материкнинг шим.шарқий қисмида ва қирғоққа ёндош оролларда. Майд. 1730,6 минг км2. Аҳолиси 3,6 млн. киши (2001); 80% шаҳарларда яшайди. Маъмурий маркази — Брисбен ш.
Квинсленднинг шарқий қисмида Катта Сувайирғич тизманинг шим. қисми жойлашган. Ғарбий қисми эса пасттекислик. Иқлими штатнинг шим. да субэкваториал, жан. да тропик. Янв. нинг ўртача т-раси 20—25°, июлники 15 — 25°. Йиллик ёғин Квинсленднинг шарқида 2000 мм, айрим жойларда 2500 мм гача, ғарби саванна ва чўллардан иборат.
Квинсленд ҳудудининг 2% дан кўпроғи ишланади. Деҳқончиликка яроқли ерлар, асосан, Тинч океан соҳилидаги камбар текисликда. Қ. х. да чорвачилик етакчи тармоқ. Штат мамлакатда тайёрланадиган жун, гўшт, сариёғ, пишлоқнинг катта қисмини етказиб беради. Соҳилда ананас, банан, манго ва б. тропик мевалар, шакарқамиш етиштирилади. Ғарбий қисмида буғдой ва маккажўхори экилади, сут чорвачилиги ривожланган. Квинсленд мис, боксит, рух ва қўрғошин, рутил, циркон, тошкўмир, вольфрам қазиб чиқаришда ҳамда олтин, нефть ва табиий газ олишда мамлакатда олдинги ўринларда. Мамлакатда қазиб олинадиган миснинг ярмидан ортиғи штат ғарбидаги Маунт-Айза конларидан олинади. Уран, калай, темир рудаси ҳам қазиб олинади. Машинасозлик, кемасозлик, кимё, озиқ-овқат ва б. саноат тармоклари ривожланган. Йирик саноат шаҳарлари: Брисбен, Гладстон, Таунсвилл, Маккай, Кэрнс.