МАРГИМУШ РУДАЛАРИ — таркибида маргимуш ва унинг бирикмаларини ажратиб олиш иқтисодий жиҳатдан мақсадга мувофиқ бўлган табиий минерал ҳосилалар. Ўзида маргимуш сақловчи 120 дан ортиқ минерал маълум. Маргимуш рудаларининг энг кўп тарқалган минераллари: арсенопирит (FeAsS), лёллингит (FeAs2), реальгар (As2S2), аурипигмент (As2S3) ва б. Маргимуш бирикмалари, кўпинча, рангли ва нодир металлар мажмуасида учрайди. Саноат рудаларида маргимушнинг энг кам микдори 2%ни ташкил қилади. Маргимуш рудалари конларидан Ўзбекистонда деярли фойдаланилмайди. 1960 й. ларгача ҳоз. Чорвоқ сув ом-бори яқинидаги (Бурчмулла ва б.) руда конларидан қ. х. зараркунандаларига қарши курашиш учун маргимуш ажратиб олинган. Маргимуш асл минерал шаклида учрайдиган рудаларгина Маргимуш рудалари деб ҳисобланган. Таркибида маргимуш бўлган бошқа барча рудалардан кобальт, никель, платина, мис, кумуш ва олтин олиш мақсадида фойдаланилган.