МИРЖАЛИЛОВ Саидносир (1884, Туркистон — 1937.9.10, Тошкент) — маърифатпарвар ва жамоат арбоби. 3. Саидносированинг отаси. Деҳқончилик ва савдо ишлари билан шуғулланиб, Туркистоннинг йирик сармоядорларидан бирига айланган. Пахта тозалаш з-ди қуриб, усули жадид мактабини очган. Давлат думаси мусулмон шўъбасининг Петербургда бўлиб ўтган қурултойида иштирок этган (1914). 1917 й. да Тош-кентга кўчиб келган ва шаҳар думасига аъзо бўлган. «Шўрои ислом» ташкилотининг аъзоси сифатида Туркистон Мухторият ҳукуматининг ташкил этилишида фаол қатнашган ва бу хукуматнинг хазиначиси бўлган. 1921 й. да «Туркистон» савдосаноат ширкатини ташкил этиб, ундан тушган даромад ҳисобига «Миллий иттиҳод» ташкилотини қўллаб-қувватлаган ҳамда Германияга ўқишга юборилган талабаларни нафақа билан таъминлаган ва уларга моддий ёрдам кўрсатган. Миржалилов «Нашри маориф» маърифий ташкилоти ва «Кўмак» жамиятининг асосчиларидан бири (1923 — 25). Миржалилов 1925 й. дан бошлаб бир неча марта қамоққа олинган; 1937 й. да отиб ташланган.