МУҲАММАД ТУҒЛОҚ (? – 1351) – Деҳли султонлиги ҳукмдори (1325—51). Ҳукмронлигининг дастлабки йилларида мамлакат ҳудудини кенгайтирган. Муҳаммад Туғлоқ Деҳли ш. да туриб Деканни бошқариш мумкин эмаслигини тушуниб, шим. пойтахт аҳолисини Девагири ш. га кўчириб, янги пойтахтни Давлатобод деб атаган. Лекин бу билан мамлакатдаги сепаратик ҳаракатни тўхтата олмаган, Жан. Ҳиндистон, Декан, Бенгалия Деҳли султонлигидан ажралиб чиққан. Муҳаммад Туғлоқнинг иқтисодий тадбирлари: солиқларнинг кескин ошиши (деҳқонлар қишлокларни ташлаб кетишган, натижада далалар ишловсиз қолган), давлат хазинасини тўлдириш учун қиймати паст тангаларнинг жорий қилиниши ва б. мамлакат хўжалигининг барбод бўлишига олиб келган. Муҳаммад Туғлоқ ўз даврининг ўқимишли кишиларидан бўлиб, астрономия, фалсафа, математика ва б. фанлардан хабардор бўлган, форс тилида шеърлар ёзган.