МУРСАК, мурасса (араб. — зийнатланган, безатилган) — авра-астарли, узун енгли, қад. устки кийим. Бичиғи тўғри бичимли, тўн ёқали, олди чуқурроқ ўйилган, этак барлари бир-бирига кирган, икки ён томонида майда бурмаларга йиғилган. Мурсак четлари жияклар билан ҳошияланган. Мурсак бахмал, парча, кимхоб, адрас, шойи (астари шойи, ип матолар) дан тайёрланган. Мурсакнинг ичига юпқа пахта солиб қавилган (қишки) ҳамда яланг қаватли (авра-астардан иборат ёзги) турлари бор. Шарқ халқдари орасида кенг тарқалган, ҳатто қизларнинг сепига киритилган. Кўйлакнинг устидан кийилган, белига белбоғ боғланган. 19-а. гача аёллар учун устки кийим ва ёпинчиқ вазифасини бажарган, кейинчалик тўй ва азаларда фойдаланилган. Ҳозирда аёлларнинг тобути устига ёпиладиган ёпинчиқ сифатидагина ишлатилади.