МУСАБОЕВ Мухтор Набиевич (1929.21.11, Фаргона тумани) — ҳайкалтарош, Ўзбекистонда хизмат кўрсатган санъат арбоби (1976). П. Беньков номидаги Республика рассомлик билим юрти (1950—55) ва Тошкент театр ва рассомлик санъати ин-ти (1957—63) да таълим олган. Мусабоев ижодида реалистик услубга қатъий амал қилган ҳолда композицияси аниқ, реал нафис шакл, ғоявий ёрқин асарлар яратиш, ҳаётий лавҳалар, меҳнаткашлар қиёфасини тасвирлаш алоҳида ўрин тутади: Уста Ширин Муродов (мармар, 1964, Тошкентда), Улуғбек (гранит, 1968, Самарқандда), Беруний (бронза, 1973, Тошкентда), Ал-Хоразмий (бронза, 1978 — 81, Урганчда) портретлари, «Дўстлик» монументи (бронза, гранит, 1987, Нукусда) ва б.