ОПТИМЕТР (юн. optos — кўринувчи ва… метр) — чизиқли ўлчамларни ўлчайдиган асбоб; ричагли-оптик механизм ёрдамида нисбий усулда ўлчайди. Механизмда ричагли узатгич сифатида тебранма кўзгу, оптик ўзгартиргич сифатида автоколлимацион (фокусдан чиққан ёруғлик нурини автоматик тарзда яна фокусга қайтарувчи) найча қўлланилади. Биринчи марта (1837 й.) немис муҳандиси Н. Сакстон ўлчаш асбобларида тебранувчи кўзгудан фойдаланган. 1925 й. Германияда автоколлимацион кузатиш трубаси ва тебранувчи кўзгудан фойдаланиб Оптиметр тайёрланган. Кейинчалик бундай асбоб анча такомиллаштирилган. Оптиметрнинг вертикал ва горизонтал хиллари бор. Кузатиш трубасида ўлчаш натижаси окуляр ёки проекцион усулда ҳисобга олинади. Оптиметр трубасининг шкаласи 1 мкм ли бўлинмаларга бўлинган, шкала бўйича ўлчаш чегараси ± 100 мкм. Бўлинмаларнинг қиймати 0,2 мкм, ўлчаш чегараси 25 мкм бўлган О. Ультраоптиметр дейилади. Оптиметр калибр, ясси-параллел плиталар ва б. нинг чизиқли ўлчамларини ўлчашда ишлатилади.