ОСЛО

ОСЛО (1624—1924 й. ларда Кристиа-ния) — Норвегия пойтахти. Ослофьорд соҳилида, 300—400 м баландликда. Иқлими мўътадил. Янв. нинг ўртача т-раси —5° гача, июлники 16°. Йиллик ёғин 677 мм. Аҳолиси 507,4 минг киши (2000). Шаҳарга 1048 й. да асос солинган. 13-а. охири — 1380 й. ларда Норвегия қиролларининг қароргоҳи. 1572 й. дан Данияга карашли Норвегиянинг маъмурий маркази. 1624 й. ги ёнғиндан кейин шаҳар эски ўрнидан нарироқда қайта қурилган ва Кристиания деб номланган. 1924 й. дан Осло деб атала бошлади. 1814 й. дан мамлакат пойтахти. 1940 й. 9 апр. дан 1945 й. 8 майгача шаҳарни немис фашистлари қўшини оккупация қилиб турган.

Осло — Норвегиянинг энг катта иқтисодий ва маданий маркази, йирик денгиз порти. Порт орқали мамлакат ташқи савдо юкларининг 1/3 қисми ўтади. Т. й. тугуни. Аэропорти халқаро аҳамиятга эга. Осло ва унинг атрофидаги корхоналар Норвегияда ишлаб чиқарилаётган саноат маҳсулотининг 25%ни беради. Машинасозлик ва металлсозлик саноати тармоқлари ривожланган. Энергетика ва кема таъмирлаш, электротехника ва радиоэлектроника, металлургия, ёғочсозлик, тўқимачилик, полиграфия, озиқ-овқат ва б. саноат корхоналари бор.

Меъморий ёдгорликлардан Қирол саройи, собор, Миллий театр ва ун-т бинолари, ратуша ва б. сақланган. Метрополитен қурилган. Шаҳарда боғ кўп. Ун-т (1811), консерватория, драма ва опера театрлари, Норвегия ФА, музейлар, Миллий галерея бор. Богдё я. о. даги музейда Ф. Нансен ва Р. Амундсенларнинг «Фрам» кемаси, Т. Хейердалнинг «КонТики» соли сакланмоқда. Осло чанғи спорти марказларидан. 1952 й. да шаҳарда 6-қишки Олимпиада бўлиб ўтган.