ПОЛИАНДРИЯ (поли… ва юн andros — эр) , кўп эрлилик — гуруҳли никоҳнинг камдан кам учрайдиган шакли, унда аёлнинг бир неча эри (одатда, ака-укалар) бўлади. Асосан, матриархат даврига хос. Бу даврда ҳар бир аёлнинг бир неча эри бўлган. Полиандрияда хотинлар эркин эр танлаганлар, эр-хотинлик, оила турғун бўлмаган. Полиандриянинг асосий шакллари:
1) бир уруг авлодлари Полиандрияси (бир уруғ аъзолари бўлган эркаклар бир аёл ёки аёллар) га эр бўлади;
2) ака-ука (туғишган биродарлар) Полиандрияси (ака-ука бўлган бир неча эркак бир аёлга эр бўлади). Ака-ука Полиандриясида катта аканинг хотини ҳамма укаларига хотин бўлади. Туғилган болалар ҳамма оталарники ҳисобланади. Оилага тегишли ер ва мулк болаларнинг энг каттасига мерос бўлиб қолади. 19-а. да алеутларда ва эскимосларнинг айрим гурухларида мавжуд бўлган; кейинчалик Шим. Ҳиндистон ва Тибетдаги айрим этнографик гурухдарда сақланиб қолган.