ПОЛИСПАСТ (юн. polyspastos — кўп арқонлар билан тортиладиган) — бир неча қўзғалувчан ва қўзғалмас блоклар ҳамда шу блоклар орқали ўтказилган пўлат арқонлар (трослар)дан иборат юк кўтариш қурилмаси. Полиспаст ёрдамида кўтариладиган юкнинг вазни блоклар ва пўлат арқонлар тармоғига тарқалади, шунинг учун юкни кўтариш унча қийин бўлмайди. Полиспаст кўпинча юк кўтариш машиналари (мас, юк кўтариш кранлари)нинг бир қисми ҳисобланади. Баъзан, Полиспаст чиғир (лебедка) билан бирлаштириб ясалади. Енгил юкларни кўтаришда Полиспастнинг ўзидан мустақил тарзда фойдаланиш мумкин. Полиспаст қурилиш, портлар ва уй-рўзғорда ишлатилади.