ПОРТ-ОФ-СПЕЙН — Тринидад ва Тобаго давлати пойтахти. Мамлакатнинг муҳим сиёсий, иқтисодий ва маданий маркази. Тринидад о. нинг шим.-ғарбий қисмида. Иқлими субэкваториал, ўртача т-ра янв. да 25,8°, июлда 26,7°; йиллик ёғин 1910 мм. Аҳолиси 49 минг кишидан зиёд (2000). Атлантика океанининг Пария кўлтиғи соҳилидаги порт. Металлсозлик, тўқимачилик, озиқ-овқат, цемент саноат корхоналари, кема верфи мавжуд. Қурилиш материаллари ишлаб чикарилади. Порт орқали четга нефть маҳсулотлари, шакарқамиш, кофе, цитрус мевалар чиқарилади. Ун-т, миллий музей, бадиий галерея бор.
Испанлар келгунга қадар П.-о-С. ўрнида индейсларнинг Конкерабия қишлоғи бўлган. 1783 й. дан Испаниянинг Тринидад о. даги мустамлакасининг маъмурий маркази, 1797 й. дан Буюк Британия қўл остида. 1962 й. дан мустақил Тринидад ва Тобаго пойтахти.