ПОТСДАМ — Германиядаги шаҳар. Бранденбург ерининг маъмурий маркази. Берлиндан жан.-ғарбдаги кўллар бўйида жойлашган. Аҳолиси 129,8 минг киши (1998). Транспорт йўлларининг йирик тугуни. Хафель дарёси бўйидаги порт. Машинасозлик ривожланган. Кимёфармацевтика, полиграфия, озиқ-овқат саноати корхоналари мавжуд. Мамлакатнинг тарихий ва мада-ний марказларидан. Кинематография ва телевидение олий мактаби, астрофизика расадхонаси, музей бор.
Потсдам йилномаларда 10-а. дан тилга олинган. 13-а. да Бранденбург Маркграфлиги таркибига кирган. 15-а. да шаҳар ҳуқуқини олган. 18-а. охиридан Пруссия қиролларининг ёзги қароргоҳи.
Потсдамда 1945 й. да СССР, АҚШ ва Буюк Британия давлат раҳбарларининг конференцияси (Берлин конференцияси) бўлиб ўтган. Меъморий ёдгорликларидан 18—19-а. ларда қурилган сарой ва черковлар, шу жумладан, Сан-Суси саройбоғ мажмуаси (1745—62) сақланган.