ҚАШҚАДАРЁ ҚЎҒИРЧОҚ ТЕАТРИ — Қашқадарё вилояти давлат қўғирчоқтеатри. 1994 йил 15 мартда «Дангасанинг ҳоли вой» (реж. Ш. Юсупов, рассом В. Акудин) спектакли билан очилган. Театр Мулла Тўйчи Тошмуҳамедов номидаги Қашқадарё вилоят мусиқали драма театри биноси ичида, бир қанотидаги зал мазкур театрга мослаштирилган (80 ўринли). Дастлабки йилларда С. Бердиев, Ж. Тошев, Д. Каромов, Р. Мустафоева, Х. Сатторов, А. Рўзиева, Б. Пратов, И. Бутунов, А. Сатторовлар ишлаган. Фаолияти давомида театр «Қопқоқ», «Қовоқвой ва қовунлар». «Ғаламислар қўзғолони» (муаллифи ва реж. X. Сатторов), «Чийчийойнинг саргузаштлари» (З. Чеповецкий; Ш. Юсупов), «Қувноқ масхарабозлар» (Х. Сатторов; Ғ. Ҳамроев), «Баджаҳл қуёнча» (М. Супонан; Ғ. Ҳамроев), «Чимилдиқ» (Э. Хушвақтов; Х. Сатторов), «Ғаройиб меҳр», «Очкўз Качал» (И. Саидалимов; Ғ. Ҳамроев), «Қуёш нури» (Е. Попеску; Ғ. Ҳамроев), «Қитирқитир ким бўлди» (Е. Чеповецкий; Х. Сатторов), «Мешполвон» (А. Обиджон; Ғ. Ҳамроев), «Мен даҳшатли Бармалей» (Х. Сатторов; М. Тўрақулов) каби спектакллар, бир қатор қўғирчоқ концертларини саҳналаштирган. Болалар онгига миллий ва умуминсоний қадриятлар, ахлоқий мезонларни сингдириш вазифасини бажаради. Театр, мактаб, оромгоҳлар саҳналарида ҳам томошалар кўрсатади, катта театр ва Қарши шаҳри майдонларида ўтказиладиган байрам ва юбилей тадбирларида қатнашади. Театрнинг шаклланиши ва ривожланишида реж. Ғайрат Ҳамроевнинг хизматлари катта. Театрда реж. Холмурод Сатторов, рассом Мирзоҳид Маматов, актёрлардан С. Саидова, А. Худоёров, И. Саидолимов, Ш. Тўхтамишев, И. Қурбонов, О. Маматов, Т. Худойбердиев, Ф. Бекназаров, Н. Ҳусанова, Л. Примова ва бошқалар етакчилик қилмоқдалар.
Муҳсин Қодиров.