ҚОРАҚАЛППОҚ ДАВЛАТ ҚЎҒИРЧОҚ ТЕАТРИ — 1990 й. ташкил топган. Театр «Ориқ мерган» (К. Каримов) спектакли билан очилган. 1991 й. Самарқандда ўтказилган фестивалда театр «Ориқ мерган» ва «Оқ такача билан кўк такача» спектакллари, 1993 й. Андижон фестивалида «Керак бўлганинг керак», 1995 й. Тошкент фестивалида «Бедана ва тулки», 2000 й: Самарқанд фестивалида «Шум эшак» каби спектакллари билан қатнашиб, совринли ўринлар эгаллади. 2001 й. Тошкентда ўтказилган «Қорақалпоғистон маданият кунлари»да театр «Ўғирликнинг охири хўрлик» спектакли билан қатнашди. П. Айтмуротовнинг «Отам айтган афсона» асари асосида ишланган томошабоп, серзавқ томоша кейинги йиллар ишланган энг яхши спектакллардан. Жубандиқ Ибрагимов, Роза Пиёзова, Қурбонгул Сапарбаева, Ойбек Есимбетов, Қублонбек Қалилаев, Бердимурод Юсупов ва б. театрнинг етакчи актёрларидир. Бош реж. и ва бадиий раҳбари М. Заматдинов.