ҚОРАТОВ — Тяньшан тоғларининг шим.-ғарбий тармоғи. Уз. 420 км дан зиёд. Қозоғистоннинг Жамбул, Жан. Қозоғистон ва Қизилўрда вилоятлари ҳудудида жойлашган. Шим.-шарқдан ЧуСарисув, жан. ва жан,-ғарбдан Сирдарё ботиқлари билан ўралган. Энг баланд жойи 2176 м (Бессоз тоғи).
Қоратовнинг сувайирғич қисми текисланган юзалардан иборат. Ён бағирлари асимметрик тузилишга эга: шим.-шарқий ён бағри тик. Тизма герцин бурмаланиши даврида шаклланган ва янги тектоник ҳаракатлар таъсирида кўтарилаётган гумбазсимон-палахса типидаги антиклинорийдир. Сланец, қумтош, конгломерат, гнейс, оҳактош, доломитлардан ташкил топган. Қуйи палеозой даври оҳактошлари, айниқса, кенг тарқалган. Буларда карст жараёнлари яхши ривожланган бўлиб, карст воронкалари, ботиқлари, ғорлари каби рельеф шакллари ҳосил бўлган. Қоратовда йирик фосфорит ва полиметалл руда конлари (Мирғалимсой, Кентов, Ачисой ва б.) очилган ва қазиб олинмоқда.